Iraila planez beteta dator Bizkaian: kontzertuak, jaialdiak, kaleko artea, naturan murgiltzeko esperientziak eta, jakina, gure gastronomia. Uda agurtzeko eta udazkenari ongietorria emateko aukera paregabea.

Arte eta antzerkia kalean

Bilbok eszenatoki handia izaten jarraitzen du. Hilabete osoan zehar jarraituko du Eszena Kalera programak, doako emanaldiak eskainiz auzoetako plazetan: kaleko antzerkia, magia, dantza, zirkoa edo txotxongiloak, publiko guztientzat.

Antzerkia, dantza, zirkoa, musika eta magia hurbiltzen dira auzoetara, guztira 30 ikuskizun baino gehiago 17 konpainiaren eskutik. Euskaraz, gaztelaniaz, elebidun zein hitzik gabe, doan eta publiko guztientzat.

📍 Hasiera Indautxuko plazan izango da, Zirika Zirku taldearen Marietak zirkus ikuskizunarekin.
📍 Amaiera, berriz, irailaren 30ean, Zorrotzako Hortzmuga Teatroarekin, Matikoko Orain-Birekin eta Santutxuko La Glo Zirko Dantza-rekin.

Gainera, irailaren 15ean, Zirkozaurrek haurrentzako zirko tailerra eskainiko du Indautxun, txikiek malabare eta akrobazietan lehen urratsak eman ditzaten.

Irailaren 18tik 20ra Rekalde auzoan egingo da Zirkualde, Euskadiko arte zirkarien jaialdi bakarra. Sei konpainiaren emanaldiak eta familientzako jarduerak izango dira bertan, eta nabarmentzekoa da III. Dantza Bertikalaren Topaketa, irailaren 18an El Fango kiroldegian publikoari irekitako saioekin.

 Musika jaialdiak

Musika ere indartsu dator irailan, tradizioa, abangoardia eta giro paregabea uztartzen dituzten jaialdiekin:

Getxo Folk: erroetako musiken eta nazioarteko folkaren erreferentea.
Irailaren 10etik 14ra bitartean, Getxo Folk jaialdiak bere 41. edizioa ospatuko du. Publikoari musika hurbiltzeko konpromisoa berresten du, ikuspegi moderno batetik, erritmo tradizionalak hainbat estilo eta generoekin uztartuz.
Programak kalean egingo diren ekitaldiak eta Muxikebarrin antolatuko diren kontzertuak barne hartzen ditu.

Folkez Blai, Ermuan: musika herrikoia kalera hurbiltzen duen klasikoa.
Aurten, Folkez Blai jaialdiak 20 urte betetzen ditu, eta ospakizun berezi honetarako irailaren 12tik 14ra jarduera zirraragarriz beteriko egitaraua prestatu du. Azken fasea Cardenal Orbe plazan izango da, non sei taldek lehiatuko duten final handian.

Dale CandELA: elkartasunaren eta energien jaialdia.
Irailaren 18tik 21era, Getxoko Puerto Viejo elkartasun-gune bihurtuko da, lau eguneko jaialdi baten bidez (sarrera doan).
Musikaz gain, ekintza artistikoak, kirolak, haur-jarduerak, kontzientziazio-ekimenak eta gastronomia izango dira. Helburua argia da: ELA gaitza ikusaraztea, ikerketa bultzatzea eta gaixoei laguntzea.

Sopela Kosta Fest: surfa, musika eta kultura itsaso ondoan.
2025eko Sopela Kosta Fest irailaren 19tik 21era ospatuko da.
Uda agurtzeko jaialdi honek berriz ere natura, surfa eta kultura uztartuko ditu, publiko guztientzako jarduera-programa anitzarekin.

Mahasti Artean 2025: musika, umorea eta esperientziak mahastien artean

Iraileko plan berezienetako bat da Mahasti Artean, Bizkaiko upeltegi eta mahastietan egiten den zikloa, non musika, kultura eta txakolina batzen diren.

Aurtengo edizioan, ekitaldien erdigunea izango da Talleri Berria upategia, Morgako herrian, ingurune natural zoragarriz inguratuta. Bertan izango dira kontzertuak, komedia, yoga eta gastronomia-esperientziak, duela 50 urte baino gehiago bertan zegoen teilategiari omenaldia eginez.

Egitarauak hainbat jarduera biltzen ditu, besteak beste:

• Mahasti Komedia Tu-Tum, Platz!, Jon Plazaola aktore eta umoristarekin.

• Mahasti Yoga, yoga saioa mahastien artean, txakolin eta pintxo dastaketarekin.

• Mahasti Musika, iluntzean kontzertuak, txakolin eta Idiazabal gaztarekin.

• Mahasti Gourmet, bisita gidatua eta DJ musikaz lagundutako dastaketa.

Ekintza guztietan Bizkaiko Txakolina Jatorri Deitura osatzen duten 35 upategietako batzuen txakolinak dastatu ahal izango dira. Uda amaitzeko eta mahats-bilketa hasteko plan ezin hobea.

Pintxoen ibilbidea: zaporea eta tradizioa

Bizkaian ezinbesteko plana da “pintxo-potea” egitea. Gure gastronomia txiki baina zapore handiko mokaduetan bizi da: betiko gilda eta bakailao pintxoetatik hasi eta pintxo sortzaile eta modernoenetaraino.

Disfruta Bizkaiaren Pintxo Ibilbideak aukera onenak bildu ditu: barra ezagun eta esanguratsuenak, pintxo tradizionalak eta berritzaileak dastatzeko. Plan ezin hobea da bisitan datozenentzat nahiz bertakoentzat, auzo eta herri bakoitzeko altxorrak berriz ezagutzeko.

Bizkaian gastronomia ez da bakarrik jaten: partekatu egiten da, lagun artean gozatzen da, eta gure bizitzeko moduaren parte da.