Zer zapore du zure Aste Santuak? Itsas gazia, mendi usaina, herri-ohitura ala eguzkitan hartutako pintxo batena?
Bizkaian ez duzu aukeratu beharrik, plana dena delakoa dela ere, asmatuko duzulako. 2026 honetan, gure lurraz gozatzera gonbidatzen zaitugu: erlojuari begiratu gabe eta gure gertutasun berezi horretaz blaituz.
Kantauri itsasoaren harrotasunetik gure mendien bakeraino, Bizkaia dotore jantzi da egun ahaztezinak bizi ditzazun.GUrekin etorri nahi?
Aste Santua Bilbon: tradizioa, kultura eta gastronomia
Aste Santuan, Botxoa iraultza txiki bat izaten da. Ohiko prozesioen errespetuak eta gaur egungo planik freskoenek bat egiten duten une berezia da. Hiria buruz ezagutzen duzula uste baduzu, eman buelta bat egun hauetan; energia desberdin bat sumatuko duzu, tradizioa eta ondo pasatzeko gogoa kalean elkartzen direnean sortzen den horietakoa.
Basque FEST 2026:
Apirilaren 2tik 5era, Bilbo ez da bisitatzen, ospatu egiten da. Ahaztu jaialdi arruntak; Basque FEST gure izaeran murgiltzeko aukera paregabea da. Kaleak oilo-ipurdia jartzen duen musikaz, istorio zaharrak kontatzen dituzten dantzez eta herri kirolen indarraz betetzen dira. Doako 100 proposamen baino gehiago izango dira, gure herriaren erakusleiho bizia. Ez galdu arrastoa, laster argitaratuko dugu-eta 2026ko egitarau osoa!
Arimadun prozesioak:
Bilboko Aste Santua bizitzea hiriaren alderdi barnekoien eta zirraragarriena ezagutzea da. Erramu Igandean (martxoak 29), “Astitxoaren” prozesioak pozez betetzen du erdigunea. Baina bihotza taupada bat galduko duen une baten bila bazabiltza, Astelehen Santuko Nazarenoaren prozesiora joan behar duzu. Irudiak goiko auzoetatik jaisten ikustea eta Gorte kalean bizitzen den unea —isiltasun osoa saeten deitoreekin apurtzen denean— erlijioaz harago doan esperientzia hunkigarria da.
Bilbon galdu ezin dituzun planak:
Bilbo ez da azaltzen, ibili egin behar da. Bost zentzumenekin eta, batez ere, presarik gabe deskubritzen den hiria da:
Gure museoekin gozatu: Ez da argazki polit bat ateratzea soilik. Guggenheim-eko titaniozko kurben artean galtzea ia derrigorrezkoa da, baina Bilbok askoz gehiago du. Arte Ederren Museoa gure altxor preziatua da, eta Arkeologikoak gure erroetara bidaiatzera gonbidatzen zaitu. Itsas gizon-emakumeen harrotasuna sentitu nahi baduzu, Itsasmuseum dugu itsasadar bazterrean. Eta zuri-gorria bazara? San Mames Museoa daukazu “Katedralean”. Zerbait desberdina nahi baduzu, San Frantziskoko Berreginen Museoa harribitxi bat da eliza zahar baten barruan, eta Atxuriko Arte Sakratuaren Museoak zentzu berezia hartzen du egun hauetan.
Itsasadarrean zehar oinez: Udaletxetik Olabeagaraino joan. Ibilbide zoragarria da, non garai bateko industria-kaiak gaur egungo parke eta diseinu abangoardistarekin bizi diren.
Zazpi Kaleetan galdu: Alde Zaharreko harrizko kaleak zapaldu, begiratu gora parveetara eta arnastu giro berezi hori. Denaren sorlekua da: historiaz, tabernaz eta betiko dendez betetako labirintoa.
Pintxoaren artea: Hemen turismoa mokaduz mokadu egiten da. Utzi Plaza Berriko barra dotoreek seduzitzen zaituztela, edo ibili Zabalgunean, Diputazioan eta Indautxun. Txoko bakoitzak du bere altxor txikia tragoxka batekin laguntzeko.
Santurtzi: Abentura bat Carmen Sardina-saltzailearekin
Santurtzi itsas giroan bizi da. Aurten, historia eta umorea uztartzen dituen denboran zeharreko bidaia proposatzen dizugu.
Noiz? 2026ko apirilaren 2an eta 3an.
Non? Santurtziko Portuan (Arrantzaleen Kofradia Zaharra).
Sarrera: 2 €. Ahaztu gida aspergarriak. Hemen Carmen, gure sardina-saltzailerik bitxiena, izango da protagonista. Bere grazia bereziarekin, antzinako itsas bizitzaren sekretuak erakutsiko dizkizu. Barreak, pasadizoak eta amaiera bikaina: arrain enkante bat garai bateko erara. Gure kostaldeko esentzia purua!
Balmasedako Pasio Bizia
Balmasedako Pasio Bizia Bizkaiko Aste Santuko klasiko handienetako bat da. Gorriz markatutako hitzordua. Ez da antzerkia bakarrik; herri oso baten harrotasuna da, Kristoren azken egunak sinesgarritasun harrigarriz irudikatzen baitituzte. Ostegun Santu gauean eta Ostiral Santu goizean (apirilak 2 eta 3), Balmaseda duela bi mila urteko Jerusalem bihurtzen da. Ikusi beharrekoa, zalantzarik gabe.
📍 Info eta sarrerak: viacrucisbalmaseda.com
Uribe, Plentzia eta Gorliz: Itsasadarraren eta itsasoaren arteko besarkada
Uribe eskualdean, mahastien berde biziak eta Kantauriko urdinak bat egiten dute, upategi baten txinpartaz gozatzeko ingurune aproposa sortuz.
Plentzia eta Gorliz: Ezinezkoa da badia honekin ez maitemintzea. Plentziak bere itsas kaleetan galtzeko eta Butroeko Plasentia Museoa bisitatzeko gonbita egiten dizu. Zubia zeharkatuz, Gorlizek bere hondartza amaigabea, dunak eta itsasargirako bidea eskaintzen dizkizu, Bizkaiko begiratokirik onenetakoa.
Bisitatzeko txokoak: Barnealdetik kostalderaino
Barnealdea: Historia, bakea eta ikurrak
Gernika: Askatasunen ikurra. Batzarretxea eta Gernikako Arbola bisitatzea euskaldunon bihotzarekin konektatzea da, Urdaibai erdian.
Durango: Apirilaren 3an, herria sudur gorriz beteko da Tontolapiko Egunarekin, familia osoarentzako magia hutsa den clown jaialdia.
Urduña eta Markina-Xemein: Merkatari eta pilotari handien istorioak gordetzen dituzten Erdi Aroko hiribilduak.
Kostaldea: Kantauriren indarra
Gaztelugatxe: Gure nazioarteko ikurra. Erreserbatu sarrera garaiz eta gozatu zure bizitzako 241 eskailera maila aberasgarrienez.
Omako Basoa: Ibarrolaren arteak zuhaitz artean taupaka jarraitzen du ingurune magiko batean.
Bizkaia Zubia eta Portu Zaharra: “Bizkaiko Zubia” zeharkatu eta amaitu arratsaldea Algortako Portu Zaharrean pintxo batekin eta ahaztezina den ilunabar horietako batekin.
Pozalaguako Kobak: Karrantzan “estaktita eszentrikoen katedrala” duzu zain, lur azpiko mirari geologikoa.
Aste Santu honetan, ahaztu presaka ibiltzeari. Ez da korrika egiteko garaia, dastatzekoa baizik. Inprobisatzeko, gogoko duzun leku horretara itzultzeko eta berri bat deskubritzeko. Tradizioa eta terrazetako giroa, itsasoa eta mendia, kultura eta gastronomia uztartzeko.
Bizkaia zure zain daukazu, zure modura bizitzeko.
Utzi erantzuna