Errutinara buelta? Tira, ez denontzat! Batzuentzat iratzargailua berriro jotzen hasi den bitartean, etxeko txikienek (eta beste zorioneko baten batek) oporretan jarraitzen dute. Jaiegunetako nahaspila igarota, Bizkaia guretzat gelditu da: lasaiago, jatorrago eta presarik gabe gozatzeko prest.
Disfruta Bizkaitik, plan bikainak dakizkizuegu 2026ko Pazko Aste hau borobila izan dadin. Adi egon, bagoaz eta!
Historia eta tailerrak Muñatones Gazteluan eta El Pobalen
Iraganera bidaiatu nahi baduzu eskuak orean dituzula, Muskiz da zure lekua. El Pobaleko Burdinolak eta Muñatones Gazteluak luxuzko agenda prestatu dute familientzat:
Txoripan goxoa! (apirilak 7): Artisau-ogia oratuko dugu, txorizotxoa jarri eta… egur-labean sartu! Betiko hamaiketakoa.
“Salba dezagun Lope ahaidea” ginkana (apirilak 8): Gazteluan asmamena lantzeko probak, Lope Gartzia Salazarrekoa salbatzeko. Zaldun eta andereño txikientzat ezin hobea!
Pasta tailerra Txaramelarekin (apirilak 10): Tortelliniak edo fetucciniak egitea osagai ekologikoekin.
Sutan jolasean (apirilak 11): Ikasi forjaketaren oinarriak errementariaren eskutik.
Plan lasaiagoa nahiago? Bisita gidatuak daukazue arratsaldez, eta suaren zein burdinaren erakustaldiak burdinolan apirilaren 3, 4 eta 11n.
📌 Izen-emateak eta informazio gehiago: bizkaikoa.bizkaia.eus
Ontziratu, grumeteak! Itsasmuseum Bilbon
Itsas Museoak bela guztiak zabaldu ditu 4 eta 11 urte arteko umeentzako tailer elebidunekin. Plan borobila da: haiek ekologiaz eta historiaz ikasten duten bitartean, zuk bueltatxo bat eman dezakezu itsasadarretik.
Apirilak 7: “Nemoren superbotereak” (Altxorraren bila).
Apirilak 8: “Itsasoko soinuak” (Zentzumen-tailerra eta balea-eskulana).
Apirilak 9: “Itsas izarrak” (Ezagutu animalia harrigarri hauek).
Apirilak 10: “Elkanoren bidaia” (Historia eta nabigazioa).
📌 Izen-emateak eta informazio gehiago: itsasmuseum.eus
Artea eta Natura: Omako Baso “berria”
Kortezubin Agustín Ibarrolaren obraren zaharberritzea eta lekualdatzea ikusi ez baduzu, aste hau da unea. Ibilbidea egokituta dago eta udaberriko argipean margotutako zuhaitzak ikustea magikoa da.
Gogoratu: Oinetako erosoak, ura eta argazki-kamera. Ikuskizun bisual hutsa da! 🧐 Sartu Omako Basoari buruzko artikulu berezi honetan; jakin behar duzun guztia kontatzen dizugu.
San Juan de Gaztelugatxe eta Bizkaiko Flyscha
Jende gutxiago dabilen egun hauek aprobetxa itzazu San Juan de Gaztelugatxe. bisitatzeko. Jende gutxiagorekin, itsasoko hotsa eta 241 eskailerak igotzea bikoitz gozatzen da.
Eta itsasertzaz gozatzen jarraitu nahi baduzu, Getxo, Sopela eta Bakio arteko Bizkaiko Flyscheko itsaslabarrek bista zoragarriak eta milioika urteko historia geologikoa oparituko dizkizute. Esploratu duela 60 milioi urte baino gehiago itsasotik sortu ziren harri-formazio ikusgarriak. Getxo eta Armintza lotzen dituen itsaslabarren ibilbidea ezin hobea da Kantauri itsasora begira oinez ibiltzeko.
Plana borobiltzeko, inguruko jatetxeren batean bazkaltzea baino hoberik ez dago. Oporretako azken tarte honetan deskonektatzeko aukera ezin hobea da eta, nola ez, geure buruari omenaldi gastronomiko bat emateko. Izan ere, Bizkaian, mendi-martxa on baten ondoren, beti dugu zain maila handiko mahai bat!
Lurpeko altxorrak: Pozalaguako kobazuloak
Karrantza Haranean munduko kobazulo harrigarrienetako bat daukazu zain. Estalaktita eszentrikoek grabitateari desafio egiten diote eta aho zabalik utziko zaituzte. Plan freskoa da (hitzaren zentzu guztietan!), aste honetako edozein arratsalderako aproposa.
Eta amaitzeko… Pintxo-ibilbidea!
Bizkaiko ezein plan ez dago osorik taberna bateko barraren aurretik igaro gabe. Bilboko Zazpikaleetan, Bermeoko portuan edo Getxoko plazetan izan, eman iezaiozu zeure buruari mini-gastronomia festa bat. Merezi duzu eta!
Baduzu gogokoenik? 2026ko Pazko Astea aukeraz beteta dator, txikiek zein helduek deskonektatu dezazuen ohiko erritmoari heldu aurretik. Disfruta Bizkaian asko maite dugu zuen abenturen parte izatea; beraz, leku horietakoren batera bazoaz, ez ahaztu gure sare sozialetan gu etiketatzeaz!
Categoría: Haurrekin egiteko planak, Turismoa, Zer egin
Utzi erantzuna